伊巴謙莫域不嬲「囂」，但又「囂」得起！話說佢喺前日國際米蘭作客贏巴勒莫前，高調話自己去到邊贏到邊，果然佢喺呢場榜首戰建首功。另一入波功臣韋拉仲堅，一係唔發市，入親波都幾乎幫球隊攞足3分。雙星拱照，國米有運行咯。
賀文仙尼42歲生辰
噚日係國際米蘭文仙尼42歲牛一，佢可以開心賀壽，「伊巴」先記一功。「伊巴」喺前日賽事意氣風發，高調話自己先後為阿積士、祖雲達斯贏過聯賽（雖然幫祖記嗰兩次最後被褫奪），有信心幫國米贏雙料冠軍。睇佢聯賽停賽復出，即刻好似出柙猛虎咁，開波7分鐘就射爆巴勒莫大門，睇嚟唔係生草藥──「噏」得就「噏」。
韋拉一樣勇，佢下半場幫國米抽入奠勝呢球，係佢加盟藍黑軍首個聯賽「士哥」。睇番韋拉近年入球重質唔重量，好似上季佢效力祖記嘅時候，對烏甸尼斯、帕爾馬都建功奠勝，幫祖記攞3分。
計埋呢場贏巴勒莫，國米已經9連勝創球會紀錄，而今季聯賽作客強隊（費倫天拿、羅馬、AC米蘭）全部W，家陣領先第2位嘅羅馬4分；除非次循環大甩轆，否則奪標機會確係幾高。
祖雲達斯幾件主將，季前散落唔同球會，似乎去西甲發展嗰幾件際遇麻麻，最掂就係轉投國際米蘭呢兩件。如今得兩大福星幫手，國米有排行運。