李超人搞3G搞咗咁耐，檔3仔有幾強橫，有目共睹。最強係周不時聽聞要將海外3G賣畀人，又或者有人想買。橫睇直睇，唔使大班霍建寧否認，華華都覺得買同賣都唔會係真，因為有價冇市！
繼上星期霍生又否認賣盤兼親身去英國推最新X-Series後，英國3仔最新動向係──炒130個經理！報道呢則新聞嘅《周日郵報》，搵到和黃發言人證實呢個消息，又話按年度計劃，08年會再增加比今年更多嘅人手……
講乜都無用，如果我係3仔歐洲啲員工，求神拜佛霍生唔好嚟巡視業務！話時話，盤數唔靚又分拆唔到上市，就搵啲經理嚟祭旗，唔知3G再止唔到血，超人有冇諗過炒啲更高級嘅總理呢？大班個職位最尾兩個字都好似係「經理」。