馬會近年挖空心思谷大賽馬投注額，周日就剛推出「四連環」呢種新彩池，小弟一向崇尚簡單就是美，通常只買獨贏位置連贏位，所以就未試過呢種新彩池，不過睇番首日投注額，平均一場都有約200萬，初步睇都算成功。
投注額每下愈況
作為莊家就最鍾意呢種彩池制玩法，收收埋埋過百萬投注額，然後抽水抽稅先按比例派畀中彩者，對莊家嚟講簡直係零風險；一般海外足球莊家，都要冒住同投注者「對賭」風險，舉個例，一場波有90%注額押向主隊，結果主隊最後波盤齊贏，莊家喺呢場波係有輸錢可能。
馬會開足智彩就巧妙地開設兩種彩池制玩法「六寶半全場」同「孖寶半全膽」，起碼叫保障收入；小弟並不反對球迷玩彩池制玩法，事關用一百幾十蚊博一百幾十萬，絕對係一般人心願，不過就絕不建議球迷玩「六寶」。事關「六寶」投注額已經每下愈況，以上周六為例，投注額只得31萬，抽埋水，俾你一注中正，都係得廿幾萬落袋；講真，如果我有兩三關10倍過外「半全場」，6串1半全場一定唔止呢個數啦！
小弟就喺外國玩過一種「Scorecast」，要球迷估中一場波首名入球同波膽先有錢收，係就係難度高，不過通常都有50倍以上回報；𠵱家首名入球愈來愈普及，波膽亦都係主流玩法，馬會不如一日揀2、3場波，用彩池制開「Scorecast」，相信會受歡迎過「六寶」啦！文:牽牛