8號仔賣盤進入倒數，雖然買賣雙方已經收晒聲，但上星期二小小超向圈中老友講出寧願唔賣，如果小股東votedown（投反對票），佢會好高興嘅心聲，之後被開名爆咗出嚟，仲被人暗寸佢「數夠飛」，有「鐵票」可以整喎單刁，小小超上星期五已公開話「冇咁嘅事」，但可能唔夠「公信力」，搞到8號仔噚日停牌，兼要打正二少嘅牌頭，出張好嚴正嘅聲明澄清！
彭德雅激死小股東
聲明大致係話，要澄清某啲報章「圍飛」嘅報道，公司主席（即小小超）同8號仔confirm咗幾件事，關於後日盈拓小股東投票係咪賣8號仔，第一佢完全冇直接同間接去叫小股東投票；第二佢冇搵人圍飛；第三佢完全冇去影響後日嘅投票。小小超聯同盈拓再次重申，小股東係按自己意願及利益去投票，大家記住跟番財務顧問嘅意見云云。真係搵嚟搞，停一停牌，又唔知浪費幾多錢，唔亂講心事畀老友知，就唔使煩啦！
講番後日朝早響獅城舉行嘅盈拓股東會，屆時由一班坡民投票決定8號仔嘅命運，都咪話唔欷歔。到時主持股東會嘅係二少頭馬彭德雅（PeterAllen）──專程由香港過去採訪班手足唔使開心住，斷估大家唔會問到乜嘢，冇點大家，好似上個禮拜五法院會議，佢冇同傳媒講嘢，只係循例答吓小股東。
當日有小股東問佢點解冇關於投票嘅分析或意見，彭彭話：「你可以睇番第14同15頁……」小股東話唔係好滿意第14同15頁講嘅嘢，彭彭話：「第14、15頁已經係獨立董事嘅建議……」
開始有火嘅小股東話，究竟盈拓值幾多錢？彭彭語：「財顧已經響企業分析報告做咗分析，但可能睇上嚟有困難，因為好多數字……」只可以講，假如打人唔犯法嘅話，相信彭彭當時已經俾人拖咗出門口！
[email protected]
