係人都知信和主席黃志祥嗜地成狂，有大好友之稱，噚日最後幾口價拼盡，爭贏南豐攞咗廣播道塊地。無論係「識英雄重英雄」抑或「商場無永遠嘅敵人」，當離開賣地場嘅時候，黃主席好禮貌咁走過去同南豐負責投地嘅蔡宏興握吓手，寒暄幾句。
黃主席：「sorry…sorry啦!」
蔡生：「個價好好吖。」
黃主席：「你哋自己嚟？」
蔡生：「係呀…係呀…」
黃主席：「哎吔真係…youshouldletmeknow…我哋可以合作，大家fifty-fifty嘛。」
蔡生：「哈哈…哈哈…」
好喇，直擊完佢哋嘅簡短對話，講番黃主席聽到拍賣官扑槌一刻，好滿意自己可以近萬蚊一呎攞咗塊地，即時豎起手指公讚吓自己，而成場人都為信和呢個成績而鼓掌，但小記記得，當年信和百億投得小西灣地皮嘅時候，全場都好熱烈鼓掌，但幾個月之後，個市就開始冧嘞。至於前年底長實同南豐近百億投咗何文田地皮，亦都有獲全場掌聲，但差唔多一年後，個市就開始「碌到𠵱家」。