獅子行頂頭大班葛霖難得遠道由英國來港，行程安排相當充實，開董事會議、為大堂重開主持開幕禮，之後直踩北方，到深圳睇廠，轉個頭到海豐自然保育區，呢位智慧型策略家幾時學咗紀勤嘅超音速步伐？
葛霖係喺上周六，帶埋亞太區主席鄭海泉、中國業務總裁翁富澤及世界自然基金會首席營運官施德理等，到廣東省海豐縣出席當地濕地項目的啓動儀式，呢個項目獅子行都有貢獻，佢哋捐咗成千幾萬畀世界自然基金會，用嚟保護海豐公平大湖省級自然保護區、福建省漳江口國家級紅樹林保護區，又喺米埔搞濕地管理培訓課程。
葛霖到海豐唔係睇吓就算，佢向當地村民了解情況，有村民送咗頂草帽畀佢做見面禮，一行人跟住去海豐縣聯安小學，葛霖仲同學生齊齊上一節環保課（圖）。