電影《父子》演員楊采妮（Charlie）、吳澋滔同許茹芸，噚日齊齊去銅鑼灣世貿中心主持聖誕亮燈儀式。對於郭富城（Aaron）蟬聯金馬影帝，Charlie喺台上話：「記得上年《父子》開鏡前，Aaron第一次攞咗金馬獎影帝，第一日開鏡寬姐（老闆邱囗寬）就放佢一日假，畀佢去慶祝。今年《父子》未上映，佢又再次攞影帝，真係好值得高興。」
不過Charlie不忘為自己鋪路，佢話：「最好寬姐之後可以開部母女片啦。」到接受訪問嗰陣，Charlie就澄清話只係同寬姐講笑，話想開部以母女為題材嘅戲，但冇正式傾過，Charlie仲話自己唔恨攞獎，最緊要係做好自己嘅戲。
拒追問戀情
提到城城事業愛情兩得意，春風滿面，Charlie就話：「佢時時都咁開心，我冇見過佢女朋友，作為朋友唔會問，佢想講就講。」
噚日嘅亮燈儀式上，大會特別喺現場大屏幕播出《父子》嘅片段，其中一幕係出爐金馬獎最佳男配角吳澋滔俾郭富城好大力咁摑咗一巴，吳澋滔話：「當時真係好痛，呢一巴我係真係痛到喊！」
