買報紙送紙巾，以前唔係Tango就係Tarbo，近年就好多報販轉用「清風」，華華喺03年沙士前上廣州，發現五星級嘅花園酒店都用佢。呢隻高檔紙巾，原來係搞地產嘅香港建設（190）大股東黃剛家族金光集團嘅出品，旗下品牌仲包括超市有賣嘅Virjoy同Breeze，合計佔咗市場達五成，係香港紙巾批發嘅「一哥」。
黃剛解釋，金光雖然根在印尼，但呢廿年喺中國內地投資咗650億元，造紙業務更佔其中500億元，喺行內排名全球第五。金光又有做影印紙，共40個品牌，年產量達1000萬噸，香港好多影印舖、雜誌社都有用，穩佔六成市場。
另外，亦有做精品盒，客仔有Chanel同SK-II，黃剛好自豪咁話，玖龍係用再造紙包裝，佢哋就用原漿紙喎。咁都可以認叻？