衫褲鞋襪、AV電器都經常劈價，但日本料理劈得咁勁都係第一次！銅鑼灣昭陽馬老闆話：「今次淨益《蘋果》讀者，全店壽司買一送一！」須知呢度嘅壽司件件8"成把間尺咁長，原價已經係超低再玩劈價，但會唔會將貨就價？「所有壽司魚生保證日本飛機貨，而且日日新鮮！唔新鮮唔收錢！」
記者：朱崇德
攝影：黃子偉、朱崇德
升級8"巨人壽司 買一送一！
昭陽嘅壽司，銅鑼灣出晒名屬巨人級！好似三文魚、油甘魚、白玉豚、吞拿魚、鰻魚、八爪魚等，全部都7"咁長，真係可以掉番轉包住嚿壽司飯嚟食；其他做唔到咁長嘅，好似蟹子、玉子燒等，一係就「冧」到有成1"山仔高，否則都做厚切；今次做特價，為咗玩得寸啲：「所有7"壽司升級做8"長，價錢不變，全部買一送一！」
現場食客：估啱請你食！
兩大盤壽司做$96有幾Unbelievable？現場有2個女童軍食客，老闆同佢哋講明做緊特價，可以睇Menu，估啱就請晒佢哋食！
三文魚×2件 $8
油甘魚×2件 $15
白玉豚×2件 $15
吞拿魚×2件 $8
鰻魚×2件 $10
北寄貝×2件 $8
鮑片×2件 $8
蟹子×2件 $8
蟹子沙律×2件 $10
玉子燒×2件 $6
總值$96
刺身沙律$35
三文魚、吞拿魚、油甘魚、八爪魚、白肉豚、蝦子及甜蝦等，配沙律菜、生洋葱；醬汁以甘笋、西芹配黑醋及無脂沙律油特製，入口酸酸哋、生洋葱有點辛辣，非常開胃惹味，份量有如湯碗般大。
燒三文魚頭$28
每日入8條新鮮三文魚，所以每日亦限量賣8個！一般燒三文魚頭唔連鰓骹位都賣成$68至$78：「骹位多肉、有膠質、油脂又高！」明火鹽燒，燒到標晒油，入口勁甘、香、脆，$28根本係半賣半送。
北海道燒生蠔$68
新鮮連殼生蠔足有3隻手指大，面放蟹柳、底墊沙律醬；蟹柳面燒到卜卜脆，但沙律包裹的生蠔仍嫩滑剛熟，係店內熱賣菜式。
特上刺身拼盤$228
呢個特上刺身拼盤，齋睇要成$500至$800，呢度只賣$228，真係嚇親！馬老闆話全部用頂級日本鮑片、活赤貝、海膽、日本油甘呢類上價貨！有現場觀眾搭訕：「樓上樓下壽司店食過類似拼盤，冇上面幾種貴價貨之餘，最平都賣成$280，份量少3！」
老公Simon 8"壽司
咁平！基本當做主食，必食三文魚、吞拿魚同鰻魚，齋食5件已經飽晒！
仔仔Tim 石板豚肉炒烏冬
鐵板熱住，烏冬、豬肉都燒到勁脆口、好好味！
老婆Irene 刺身沙律
八爪魚、三文魚、油甘魚、甜蝦、白肉豚乜都有，仲要湯碗咁大，$35叫我街市買都唔得。
陳Auntie 日式炒雜菜
我就鍾意食菜，炒雜菜炒至剛熟，有菜香，面撒木魚絲有日式風味。
李Auntie 燒三文魚頭
原個上真係好夠份量！燒魚頭比魚生更滑，有細路仔要叫啲熟嘢！
註：初諗每人叫一味應該夠食，但上菜先知全部份量竟然係一般日本料理嘅兩倍，全部食剩！賽後檢討係可以叫少個炒烏冬同1/3壽司！
銅鑼灣料理劈場
昭陽呢個名，蒲開銅鑼灣一定聽過！2年前喺正銅鑼灣心臟地帶，玩壽司、魚生劈場；$8件7"三文魚壽司，一招響朵，到今時今日，仲係晚晚有排隊人龍，「講平！就算好多迴轉壽司舖都未必夠我嚟，7"厚切魚生嘅份量，一般舖頭已經整到3、4嚿。」
全日本飛機貨魚生
但講到認識餐廳，就由捧來的第一杯茶開始；全木枱、皮包椅、厚身日式瓷具，雖則玩「劈場」，但日式料理排場一絲不苟，連簡單一杯茶，都係以原片綠茶葉加茉莉花炮製，「開日式料理店係我畢生志願，喺度只可以用靚嘢……由開舖第一刻鐘開始，所有魚生都淨係用日本飛機貨；我知有舖頭貪平會入中國貨，但係養魚、水質差，真係唔係我杯茶！」
量多自然價平
據知昭陽可以做劈價場，全因馬老闆早年喺西貢做魚排、兼做魚類批發開始，「人際網絡熟、攞貨平啲係一個原因，更重要係我每日賣上100kg新鮮魚生，做到『量』自然來貨價更平；而且冇隔夜雪藏貨，亦係Keep住質量嘅原因！」
睇路搵食
店舖：昭陽日本料理（29888441）
地址：銅鑼灣金百利商場5樓R3室
座位：65個
人均消費：$80-$100
交通：銅鑼灣地鐵站崇光D出口
最好賣：刺身沙律、特上刺身拼盤、北海道燒生蠔
優惠期：28/11至13/12（全店壽司買一送一）
註：優惠期間，憑即日《蘋果日報》，點菜前展示即可享有此優惠。
