【本報訊】鯪魚蓉、白鱔片、鯇魚片等火鍋必食菜式，如今因內地停止淡水魚輸港而大受影響，但火鍋店早有應變，「冇鯪魚咪用墨魚蓉、蝦膠代替囉；冇白鱔鯇魚，用石蚌、大青斑一樣得，味道仲甘香啲㖭。」由於市民對產自內地的食物漸失信心，業界已開始轉入外國貨，另闢供應線。
「有都冇人敢食」
百里鮮海鮮火鍋酒家董事總經理郭綠明指出，港人已聞淡水魚色變，「連員工都唔肯食」，近日客人點選淡水魚的次數近乎零，較多點選石蚌等價錢貴五成的鹹水魚，「之前入少咗貨，想食嘅客人都有啲意見，𠵱家公布咗話冇得食，客人就好易接受，（昨晚）生意一樣咁好喎。」
位於九龍城的食肆「城寨風情」集團總廚陳耀昌指出，客人進食火鍋現多選雞及牛類，「有（淡水魚）都冇人敢食，火鍋菜式有成百幾款，啲客識得自己調節。」該店也有進口少數菲律賓的魚類供顧客選擇。
菜式改海鮮取代
主打順德菜及各種河鮮的桶骨棧負責人黃小姐表示，昨日接獲魚販通知：「未來10日都冇貨（淡水魚），之後有冇仲未知」，因此食肆已準備將部份菜式改用海鮮取代：「冇（淡水）魚都冇辦法啦，改用海鮮煮都冇問題。其實舊年毒鰻魚之後，已經唔再淨係賣河鮮，所以今次影響冇上次咁大。」
另一間以河鮮聞名的順德公漁村河鮮酒家經理郭基表示，部份淡水魚例如花錦鱔可從新西蘭進口，但價錢較貴，他坦言即使沒有淡水魚供應也並非壞事：「其實停吓都好，可以等啲人信心返番嚟！」
促港府加強質檢
餐飲聯業協會會長黃家和說，現時業界有七成食物來自內地，但自從當地食品接連出事，有業界已部署從外國入貨，不過價錢相對較貴。以雞蛋為例，泰國等東南亞地區出產的雞蛋漸受歡迎，但價錢比內地昂貴約15%；來自歐美的新鮮蔬菜更比內地貴兩倍多。
黃家和建議港府除了應付內地食物安全問題，也要加強質檢外國食品。