中國亞麻紗出口商「一哥」金達控股，星期四就招股，華華早排搵到董事長任維明做專訪，佢自爆讀得書少，得初中畢業，所以鍾意睇人物傳記偷師，03年開始睇黎智英嘅書，《事實與偏見》刨過兩次，一有新書就會買，但未有時間睇。不過，佢斬釘截鐵話，金達同以前嘅佐丹奴完全冇生意來往，只係好buy肥佬黎對人尊重、做事負責嘅理念。
任總又自爆，金達前身係搞低檔化纖布嘅鄉鎮企業，84年差啲執笠，當時24歲嘅佢，臨危受命做廠長，救番間公司之餘，93年仲股份化改賣絲綢，99年又睇準時機，全廠轉型生產亞麻紗，七年間成為內地出口商王者，銷售額佔全球第五，總資產達7.3億元。
生意咁掂，佢話要多謝執董沈蹺明同董事張鴻文，兩人年紀分別細佢三同十一年，持高中同大學學歷，「三兄弟」自細喺浙江海鹽縣玩泥沙，之後一齊搞旺金達，上市後三人合計持股45%，有福同享。
講番亞麻紗，原來歷史非常悠久，埃及人專用嚟包木乃伊，皆因吸濕、散熱又快，最緊要天然抗菌，保證法老王遺體唔會咁快byebye。當然現代嘅用途更廣，多用喺高檔時裝方面。