投資特攻隊今次推介兩支出戰歐協盃分組賽嘅西班牙球隊，熱選有西維爾呢支近期頻頻入波勁旅，作客瑞士捉「草蜢」；冷選愛斯賓奴作客打敗最近兩場耗力甚巨嘅阿積士。華度
草蜢暫排瑞士超聯榜前列位置，國內聯賽表現唔錯，但一出到去歐洲就無貨賣。晉級歐協盃分組賽過程，對手只係瑞典低組別球隊阿維達貝治，以及匈牙利嘅維廸奧頓呢啲名不見經傳分子；但一去到分組賽，拍埋去阿爾克馬爾及利巴域等有啲級數嘅對手，即刻現形，兩場分組賽就分別主場以2:5大敗於阿爾克馬爾腳下，上輪又作客以1:4被利巴域大炒。
兩場失9球點頂
雖然草蜢只係踢咗兩場分組賽，但目前9個失球數，已經係40支歐協盃分組賽球隊中最高嘅；咪忘記仲有好多隊已經踢咗3場，都唔夠呢隊草蜢咁誇張！由此亦可見，草蜢打呢個歐協盃分組賽嘅防守力幾咁不濟。
今仗佢哋雖有主場之利，但對手係攻擊力可能比阿爾克馬爾更強勁嘅衞冕球隊西維爾。西維爾一眾前鋒，今季全部交到貨，巴西射手路爾斯法比安奴及傷癒復出的捷雲頓，於上輪就各入1球，主場以2:0擊敗葡超聯球隊布拉加。剛喺周日進行嘅聯賽，路爾斯法比安奴又建兩功，協助球隊作客大勝畢爾包3:1。
西維爾鋒將個個有貨賣
咪忘記佢哋仲有個目前喺聯賽射手榜前列位置嘅馬里籍前鋒簡路廸，以及歐協盃入球率不俗嘅小將基柏；甚至連中場艾廸安奴及丹尼爾等，亦係擅長進攻好手，今次去到瑞士鬥草蜢，又係各人增添入球進賬好時機，單係以入波能力呢一瓣，西維爾已有足夠條件開W。
博愛奴征荷開冷W
至於今次冷選揀嚟另一西班牙球隊愛斯賓奴，該隊今輪喺歐協盃作客阿積士。阿積士近況稍轉低沉，已連續4場不勝。上周中進行嘅上一輪歐協盃秩序，喺守將艾曼紐臣於早段被逐之下，作客打和布拉格斯巴達0:0；周日聯賽又有中場史奈達於早段被逐，結果更作客以0:3慘敗於鹿特丹斯巴達腳下。連續兩場比賽大部份時間10個打人哋11個，一班球員都咪話唔攰；周四佢哋繼續喺歐協盃分組賽登場，主場鬥狀態唔錯嘅愛斯賓奴，博主隊輸多場都得。
投資特攻隊金句
草蜢目前9個失球數，已經係40支歐協盃分組賽球隊中最多嘅；咪忘記仲有好多隊已經踢咗3場，都唔夠呢隊草蜢咁誇張！