正所謂「知錯能改，善莫大焉」，青年人年少氣盛犯錯，如果有悔意，我哋都應該畀個機會佢；究竟係邊個青年人？韋斯咸前鋒泰維斯是也。
話說呢位阿根廷國腳，上周六主場對錫菲聯嘅英超聯賽中，下半場由舒寧咸後備入替後，就好似食咗火藥咁大發嘮叨後，直奔更衣室沖涼換衫歸家，冇等場波打完同隊友慶祝第4場勝仗。
罰款作慈善用途
一向臭脾氣嘅泰維斯，經過周日冷靜後，竟然係周一球隊練習時，公開向領隊柏度同各隊友道歉，仲叫班隊友投票，決定佢要被罰幾多錢，而罰款就轉交當地一間醫院做慈善用途。
不過講真，泰維斯9月加盟至今，聯賽踢過4場正選同4場後備，仍然未有波入，好似「呃人工」多啲，今次罰番少少，佢都仲有着數；就算今次畀佢成功「補飛」，日後都難免同隊友「面左左」，「槌仔」韋斯咸近期有番啲起色，但阿根廷幫似乎幫唔到手，泰維斯都仲叫做有得踢吓，同胞馬斯真蘭奴已經沒機會落場。阿根廷球員近季係英格蘭都好難立足，泰維斯就算肯低聲下氣認錯，睇嚟明年1月仲喺「槌仔幫」機會不大！
「我求大俠本來都幾欣賞泰維斯今次肯認低威，但始終隊友對呢位「外族」都係有條刺，睇嚟佢喺韋斯咸嘅日子，已經進入倒數階段。」