香港建設（190）上周五先舊後新配股，配售價每股1.10元，較停牌前折讓約一成，集資6.6億元，但復牌後公司股價不跌反升，收1.56元，升28%。
配股後大股東持股量將由約71.8%降至58.3%。據大股東所講，是次配股集資，認購的投資者主要來自美國、日本及新加坡基金，仲話其中一個美國基金希望大額認購，惟未能做到。本周將公布持股量高於5％的基金名稱，到底邊幾個大「卡士」基金接貨，到時就會一清二楚。
大股東又指，是次配股係希望引入新股東，增加股票流通量。呢樣嘢值得一啲大股東借鏡，佢哋成日呻公司價值被市場低估，但手上所持股權卻超過7成，街外貨流通量不足，基金冇貨在手又點會大手喺街外掃貨？一個唔好彩大股東見「價靚」在市場沽貨，基金幾有錢都頂唔住。
香港建設前身為中日合營公司熊谷組集團，其後易手予光大國際（257），輾轉由金光集團大股東黃氏家族喺04年中接手至今。據年報載，香港建設大股東喺亞洲嘅紙漿、造紙、金融、地產同農業有30幾年經驗，仲係印尼兩間大型上市公司嘅董事。
公司90%收入來自地產，未來主力發展上海北外灘綜合項目。股價橫行大半年後，近兩周才見異動，但短期升勢太急，宜候回吐吸納。
歐陽風