好耐以前，有位長輩級嘅影相發燒友曾經同我講：「我呢部相機，唔係用嚟影人㗎……」聽完雞皮都豎起，原來，佢最鍾意拍攝風景、錦繡山河之類……如果俾旺角班電車男、Snapshot型仔型女聽到，肯定笑到面紅！或者咁講，「呢一代」人其實好興拎部DC喺手就隨心即拍，以捕捉表情、自然美感最重要，富士最新嘅F31fd就食住呢點，繼Canon、Pentax之後再玩人臉對焦，只要你塊面唔覺意攝咗入鏡頭範圍內，想甩身都難。
對寫真快過對人
如果女朋友問你：「我平時都企定定，擺晒Post俾你影㗎啦，做乜要咩人臉對焦啫？」你係呢位男朋友嘅話，記得以下ModelAnswer：「梗係有用啦！因為我想喺你唔為意嗰陣，用臉部追焦影低你最靚、最美麗自然嗰一刻囉！」聽罷，想必當堂冧晒，仲可能逼你盡快買㖭。講個秘密你知：F31fd唔只影真人稱職，影寫真集嗰陣，準繩度仲特別高。咩準繩度呢？小記「無意中」搵咗本日本女優寫真集嚟做臉部對焦測試，點知鏡頭一攝就Bango，搵真人對焦都冇咁快，更過癮係，連印刷較精簡嘅封面內頁（全頁只係得綠、白兩隻色），都居然唔使兩秒就認到女優個樣，你話係咪好神奇？如果俾我為佢加個代號，叫做「蠱惑DC」都幾啱。
記者：陳國輝
攝影：陳盛臣
臉部對焦小評：
當對正晒張臉來影相，準確度達90%以上，而且幾乎唔使等，不過若對對方側晒面，就明顯被考起，準確度同速度都打拆扣。
PROFILE
感光元件：630萬像素CCD
光學變焦：3×
光圈範圍：F2.8-5.0
焦距：36mm至108mm
屏幕：2.5"
儲存：xd記憶卡
體積：93×57×28mm
重量：185g
Fujifilm（24063223）