秋冬入饌，補身養顏菜式紛紛上場，除了常見的蛇之外，爬行類動物派出另一代表──鱷魚出動。女士們只係知道鱷魚皮好貴，一個手袋動輒都要萬元，不過佢全身由頭到尾都有豐富營養和具滋補價值，而且性質溫和，絕對唔會令人虛不受補，一家大細都啱食。
記者︰方綺君
攝影︰伍慶泉
究竟鱷魚有幾補？
鱷魚肉補氣血、滋陰潤肺及養顏，對咳嗽、哮喘、風濕等具治療功效，又含有豐富的骨膠原和蛋白質，而且脂肪含量較雞肉及紅肉少，所以係對身體非常有益的食材。
鱷魚是健康野味
鱷魚全身都係寶，鱷魚皮做皮具，食的話由鱷魚面珠、脷、手掌、腩部到尾部都有豐富營養價值。以前鱷魚肉是皇帝請客、婚嫁宴客先有得食，屬於上等珍品，行政總廚劉先生話︰「因為鱷魚既有在水中生活的海產鮮味，又有陸上動物的野香，是一種非常健康的野味。」現在食野味危險，隨時因為亂食引致病菌傳染，咁鱷魚肉呢？專家都講到咁安全，而且《本草綱目》一書中亦提到鱷魚「肉至補益」，小朋友都啱食，大朋友就更加放心啦！
蒸變皺 燉難咬 燜最好味
利苑酒家的矜貴鱷魚菜式，鱷魚肉全部來自南非及新加坡，確保肉質新鮮來源潔淨。不過要整得好味先可以放入口，究竟鱷魚肉點煮最好食？劉先生說︰「蒸鱷魚肉會令肉質變皺，燉嘅話令肉質難咀嚼，只有燜煮方法係最好。」劉生仲找來為食的歐陽應霽試食兼畀意見，阿霽話︰「以前喺澳洲試過鱷魚肉，不過當時覺得好普通，普通到無晒印象。」阿霽最鍾意鱷魚掌的肉質口感，話佢又有尾部膠質重的口感，又有啲似雞肉的味道。
瑞草雲芝燉太子鱷$198（2位用）
稱得上補湯中的補湯，有補血安神、延緩衰老、益氣固本、平喘化痰的功效，適合一家大細飲，燉出來的湯清澈，顏色金黃，記得食埋湯渣唔好浪費。
古法燜原條鱷魚尾$988（12位用）
鱷魚尾是全條鱷魚最矜貴和營養價值最高的部位，鱷魚尾走油後用瑤柱醬和薑慢火燜，以為入口會腥腥哋，點知大錯特錯，有好香瑤柱味之餘，入口竟然有啲似食花膠。
豉椒炒鱷面珠$198（4位用）
和鱷魚肉一樣，鱷魚面珠適合落鑊快炒收汁，食落先最爽口彈牙，又不會破壞鱷魚肉的鮮甜。鱷魚面珠能滋心養肺，亦有驅濕功效。
鮑魚汁燜鱷魚掌$398（4位用）
呢道係歐陽應霽創作的鱷魚菜式，用鮑汁燜，保留鱷魚的鮮味，鱷魚掌質地特別，既有膠質，又有肉食，阿霽話：「我最鍾意鱷魚掌，因為一碟菜式食到兩種唔同口感。」
黑椒生燜太子鱷$268（4位用）
用黑椒、洋葱等燜鱷魚腩1小時，開蓋後一陣惹味的黑椒味攻入鼻，好似粵菜的黑椒牛仔骨，入口似半肥瘦雞肉，還有壯筋骨、補氣血及驅濕功效。
野菌花旗參葱爆朝天肉$288（4位用）
朝天肉即係鱷魚肉，爆香後加入靈芝菇和花旗參片，所以有少許參味，鱷魚肉聽落好肉酸，不過入口似豬頸肉質地，甘香而不膩，有養顏生津、舒肝養胃功效。
建議三人餐單
三人家庭有一個小朋友的話，最好叫一個瑞草雲芝燉太子鱷，大補湯一家大小都啱飲，再叫多3個小菜，有肉有菜，呢餐既滋補又飽肚。
瑞草雲芝燉太子鱷$198
姬松茸缽仔焗石蠔（例牌）$88
黑胡椒臘腸蒸雞（例牌）$78
瑤柱扒豆苗（例牌）$98
白飯兩碗$16
茶芥2位（小朋友免茶芥）$16
加一收費$49.4
合共$543.4
屋企人夠唔夠膽食？
睇路搵食
利苑（23653238）
地址：觀塘道418號創紀之城5期apm5樓L5-L8舖
營業時間：11:30am-3:00pm、6:00pm-11:00pm
座位：約280個 交通︰觀塘地鐵站A出口
