經常行經九龍灣的人有福了！以後下午茶有好嘢食！有日去九龍灣區搵朋友食Tea，朋友帶咗我去人民飯堂食雞翼同熱狗，發現好食到不得了！雞翼的蜜糖味好香濃，真係有蜂蜜味，唔似得好多地方得個甜字，加埋蒜香非常惹味。熱狗嘅麵包咬落鬆軟，醬汁開胃不會過酸，熱狗腸皮脆而不油，與醬汁配合得好好。
問落先知呢度啲嘢食咁好味，全因老闆用心做，連微細處都交足貨。雞翼用美國雞中翼，唔會一炸就亁，所以咬落肉汁豐富。下午茶時段雞翼最受歡迎，平均賣200隻，試過一張單叫120隻㖭！而熱狗更用自家製青瓜芥末醬，香腸就用法蘭克福腸，麵包亦唔會貪快用微波爐叮，而係用焗爐焗到表面有些少脆，連配菜都用酒店做沙律嘅狗牙菜，一點都不馬虎，怪不得如此受歡迎，以後九龍灣上班族知道下午茶去邊度打躉啦！
記者：林思樂
人民飯堂（27999098）
地址：九龍灣宏開道13號景發工業大廈地下6A舖
知諸精：我百足咁多爪，話畀你知去邊度搵好嘢食！