港股呢個禮拜唔會平靜，會唔會出現過山車嘅場面就唔知，但係大嘅波動應該就好難免，後日期指結算，明日政府賣地，啲美元係咁俾人質，大戶要做嘢，藉口周街都係。
喺金融市場，最有影響力嘅單一因素係乜？就係利率，除咗因為好多商業決策都要以利率水平作為預測基礎外，基金嘅投資組合都唔少得債券呢部份，油價、金價、通脹等等，噏得出嘅都同利率有關，所以，利率永遠係市場嘅焦點，係焦點中嘅焦點，但係，除咗利率之外，乜嘢最重要呢？就係美元滙價，呢樣嘢唔難明，美國係全球最大嘅經濟體系，有好大嘅政治同經濟影響力，美元走勢會影響全球經濟，呢樣嘢唔使拗，上個禮拜五美元走勢轉弱，歐元破咗重要阻力位，如果唔跌番落1.29樓下，美元未來嘅走勢真係冇眼睇，金融市場嘅變化可能會反轉再反轉。
美國政府班高層一個接一個咁去北京，除咗講人民幣升值之外，同美元轉為「弱勢貨幣」有冇關係，相信好快會有眉目。
聯通C輪2427：聯通（762）上個禮拜升得好勁，升破咗9元，高收9.11元，成交大增，睇幅圖，短線上試10元嘅機會好大，破位睇11元。聯通C輪2427上日報收1.04元，槓桿率8.8倍（有效6.5倍），正股升上10元同11元，2427應該會喺1.70元同2.60元樓上，現價買，以正股8.80元作止蝕位。
另一隻聯通C輪3855都可以諗，不過剩餘嘅日子只有33日，要速戰速決，槓桿率11.8倍（有效9.1倍），正股升上10元及11元，3855應該喺1.50元同2.50元樓上（現價77仙）。
俊 樺