梁詠琪（GiGi）大前日（24號）參加上海舉行嘅《舞林大會》複賽，同周海媚、瞿穎等同台大跳社交舞，雖然GiGi只係中途加入呢個舞蹈比賽，不過依然表現得非常認真，為比賽苦練足足一個星期，但途中就發生意外。
因為GiGi喺演出期間太投入而觸及腰部舊患，演出後非常痛，要靠工作人員攙扶離開，由於腰痛難當，GiGi更淚灑當場，令人擔心。
練舞周身傷
因為今次比賽而愛上社交舞嘅GiGi，早前因為拉傷咗條腰，醫生曾經勸佢要好好休息，但係佢堅持繼續完成今次比賽，結果就搞出今次意外。GiGi事後舉步維艱，喺休息室入面更動彈不得，想到苦練跳舞而引起嘅腰痛同腳痛，佢就忍唔住哽咽起來，佢以普通話講話：「昨晚（23號）排練到凌晨兩點，膝蓋也痛，想着明天就要比賽，我真的不知道該怎麼辦，我對自己說沒關係，明天盡量跳好再說。」大會就話會考慮藝人嘅身體狀況，先畀GiGi退出。
