美國破產協會和道瓊斯《每日破產評論》警告，受近年十分活躍的高息貸款影響，美國企業未來6至18個月，會出現破產高峯期。雖然當地公司今年以來的貸款拖欠比率低過預期，但破產問題專家認為，拖欠比率快將回升，並會令破產個案湧現。預料美國房地產業會成為重災區，至於航空、運輸和消費品生產等行業，亦會受到一定影響。
老闆經常拖欠員工的工資，可能係破產嘅先兆。喺《MSN討論區》，網民mula大呻，佢老婆嘅老細經常好遲先出糧，搞到佢冇錢交水費、電費同其他燈油火蠟費，𠵱家唔知點算好。
CRONEWITCH教佢點樣追討欠薪：「你可以同老闆講：『我已經寄出幾張支票，後來發覺支票戶口冇錢，會俾銀行罰款，所以希望老闆喺今日食晏前出糧畀我，等我將啲錢入落銀行。』」
Mich1就話，老細經常遲出糧，反映呢間公司出現財政困難，啲職員最好盡快搵過第二份工；如果繼續喺公司做落去，將來嘅欠薪可能更多。
nervous1建議，如果老闆經常好遲先出糧，或者拖欠好多薪金，員工可以去當地勞工處求助。但若果拖欠嘅情況唔嚴重，就只需要同老闆傾掂佢，唔使去勞工處咁麻煩。