香港董事學會頒傑出董事會及傑出董事獎，攞獎人士有周松崗爵士、黃至剛博士、陳永堅呢三位經常見報人士，大家都知道佢哋叻成點；一位老友記問：「周松崗幾時攞到爵士榮銜？」年份就考起咯，總之周爵士未返香港之前係英國大集團、澳洲公司嘅CEO，在英國打工時就得到爵士銜頭，以佢嘅教育背景──培正中學、威士康辛大學學士，中文大學MBA──與英國全無關係，唔係伊頓公學、牛津畢業嘅資歷，一個華人在英國公司打工一路升到做總裁，攞到爵士，一定係叻仔之中嘅叻仔啦，中大MBA課程應該多啲請呢位威水校友返去講talk。
一位攞獎董事冇乜人識，就係中國海外發展有限公司主席兼行政總裁孔慶平，中國海外董事會亦攞埋傑出董事會獎。中國海外（688）呢兩三年成為投資者寵兒，股價由一個八左右開步，𠵱家升到接近八蚊，升到你唔信。左丁山管理一個蚊型獎學金基金，經過十幾年捐款，幾乎彈盡糧絕，無以為繼，最後心生一計，自己墊支獎學金，將基金僅餘之錢，全部買晒六八八，每股一元八角。騎騎，持有到𠵱家，基金翻生，獎學金基金可以又玩多幾年，講起嚟要多謝孔慶平領導中國海外有方，業務蒸蒸日上也。我哋個獎學金及基金，由幾位校友捐出，總數只係十萬大元，由一九九○年開始每年派五萬元獎學金，居然仲可以維持到落去，算唔算係奇蹟？經紀Ｋ嘅投資技藝功不可沒也。經紀Ｋ後來事忙，叫左丁山接棒，當然冇做得咁醒，呢次僥倖買中六八八，學生有福了。
我哋外人實在唔知中國海外嘅管理好成點，只係注意到，中國建設部派孫文傑先生來港設立中國海外，二十幾年來呢間公司上層冇發生任何雙規事件，冇遭受中紀委調查，孫文傑返回北京仍然兩袖清風，生活簡樸，大家都會明白呢間公司值得攞獎，左丁山當晚在場，拍掌拍得特別大聲啲！