馬會新瓶舊酒推出「四連環」新彩池，不過趙飛雲冇幫襯，原因好簡單，2隻嘅連贏位同3隻嘅單T已經唔易中，更何況要1場買中4隻！馬會推出新彩池目的唔係要易中啲，吸引馬迷落注咩？𠵱家推出「四連環」似乎係背道而行，現時愈來愈多人賭波，主要係因為買波易中過買馬，「捨難取易」而矣！
講起「捨難取易」，近期港股雖然係咁升，但高處不勝寒，令人賭得唔舒服，所以，散戶趁高沽貨相當多，等調整再買貨，結果當然係大戶見你唔上釣，釣餌再放大嚿啲，大市愈挾愈高，一於升到你唔信，一於升到令你無法忍手為止。
不過，精明散戶亦唔係咁易上釣，現時局面捨難取易最好抽新股，所以上周五開始招股的招金（1818）及建滔積層板（1888），以及延至今日招股的中國通信服務（552），甚至奧普料亦認購者眾，此外11月尾至12月上旬還有4隻新股招股，估計反應亦不錯，新一浪的新股熱潮將掀起。有老友話，每隻新股均入例飛，博山大斬埋有柴。
外圍日股率先轉弱
上周五美股半日市下跌46點，道指收12280，但仍守10日線，未有明顯轉弱迹象。反而日股由10月中展開的調整，仍未有完結迹象，若連15500支持位亦失守，短期走勢將更淡。綜合而言，外圍日股已率先調整，若連美股亦確認展開調整，港股將難以獨善其身，加速進入調整。
趙飛雲