報道都有講過，西九龍一號銀海啲炒家蝕到攤攤腰，有網友仲形容入伙紙係催命符。雖然係咁，發展商信置仍然擺出一副勁有信心嘅姿態，話留返110個單位出年第一季重推，仲預計樓價有5至10%升幅。
網友TommyZZ睇到呢個報道，就喺《香港討論區》度發帖：「日日唱衰一號銀海，但人哋發展商話好賣到要封盤㖭？！」，立即畀眾人叫佢唔好咁天真，信發展商講嘢。
abcpqr話：「地產商成日扮封盤，今日封明日解，呢種招數，街市師奶成日用，同賣菜婆講價時，就邊走邊話貴唔買，道理一樣，只係扮嘢。」
Anti_block亦都好質疑個盤嘅好賣程度，仲叫信置跟長實學吓嘢：「賣咗6xx單位有4xx未入伙就放盤，加埋1xx貨尾……咁有信心，不如回購所有單位再賣過……」
另一位網友oasis_oasis仲自創咗個比喻，以盛極一時嘅信和唱片業做例子：「假設新的sammimd賣100蚊，會唔會賣賣吓見好賣就話，你哋同我聽住，我下個星期先賣，到時賣125蚊隻，你哋下星期先嚟買啦！大哥呀，如果嗰樣嘢真係好賣，就立即加價or炒價賣啦……兩個星期後賣80蚊就真吖……」個盤出年係咪真係會冧價就唔知，但佢嘅分析又不無道理。