瑞房借咗社保基金8.75億元，雖然主席羅康瑞話有信心年底前可以還清，但呢件事有排煩，之前傳出有份搞借貸嘅副董事長王英偉要「問責」，明年1月就執包袱走人。
王英偉前日接受新城電台訪問時強調，好鍾意接受挑戰，唔鍾意做重複又刻板嘅工作，而瑞房喺中國仲有好多地盤未搞，好似昆明個新項目仍然需要跟進，所以唔會走人。
其實，江湖傳聞話佢辭職又好，被人迫走又好，都傳咗近半個月，11月8日已經有本地傳媒求證，王英偉當時答得好「玄」，話「做任何東西都無可能永遠，總有一個斷落的時候，暫時沒想過離開瑞安。」今次咁肯定話唔走，可能係11月16日，老細羅康瑞同記者講，未收過王生嘅辭職信，仲撐話彼此不嬲合作好好。
不過，如果做內地房產咁有壓力，王英偉亦可回歸本港瞓身搞旺旅遊業，皆因佢今個月先俾政府委任做旅發局嘅委員，呢行都大把發揮空間啦！