不少家庭都喜歡選擇7人車，一車車晒全家大細出遊。廠商努力推出型仔、豪華、大天幕、經濟等作賣點，而豐田部Isis7人MPVWald版就打正年輕家庭市場；加晒包圍、踢走B柱，型得嚟亦好有空間感！但最大賣點係百變座位，前座乘客位可摺起及變身成茶几，車廂內櫳即時變茶座，兩公婆揸車外遊揀啱靚景，隨時泊低歎個燭光晚餐都仲得！
記者：陸伊琳
攝影：伍慶泉
模特兒：Dicky、阿Lo、Jacky
好多7人MPV的座椅都可以摺起，後面5座可以變3座，騰出更多的車尾空間載貨，又或是把中排的座位摺起變成如榻榻米般，讓兩個人可以舒舒服服躺下來。豐田Isis有齊以上功能外，前面個乘客座位更可摺起變身為几仔，用嚟燭光晚餐、切蛋糕慶祝等用途多多，去到邊都可以浪漫一番。可惜架車沒有天幕，要是可仰首睇埋星星，氣氛更正！情侶視它為浪漫車，三口子家庭更可善用這個几仔，用來作BB換片床仔，小朋友用嚟做功課、畫吓畫，絕對屬實用設計。
踢走B柱 唔怕撼頭
將椅背摺起只係體貼表現一面，廠商最有創意係踢走俗稱「B柱」嘅車旁門框，打開左邊前後車門後，中間完全無阻隔，視覺上甚具空間感，而實用性亦毋庸置疑，起碼抱住BB嘅媽咪，又或公公婆婆上落車都冇咁易撼親頭。
Wald版豐田Isis亦加裝了日本Wald大包圍及Wald製的粗排氣喉，雄渾有聲，有型兼有暴走Feel，與一般大路的7人車感覺有別。在操控上表現穩定，1.8公升VVT-i引擎扭力表現平均，耗油量低，備有泊車感應系統，車價$24萬有找，都屬經濟之選。
新車四圍昅
Wald版
豐田Isis1.8規格
引擎：1,794c.c.直四DOHCVVT-i
馬力：132ps/6,000rpm
扭力：17.3kgm/4,200rpm
傳動：四前速自動波，前驅
售價：$239,000
查詢：偉昌汽車/23030328