旅遊股新世紀集團（234）10月底豪使20萬元，飛身日本搞roadshow，行程由新鴻基嘅「日本通」董事鄧少納（圖）負責，皆因佢喺當地留學時做過導遊，又出身於㗎仔證券商。佢話𠵱家跟唔同公司，每三個月去東瀛一次推介，每次都一早寄定繙譯好嘅小冊子，出發又帶齊易拉架，做到滾瓜爛熟。
佢解釋，路演去得咁密，皆因日經指數年頭雖由萬五點上過萬八，但之後回落至萬四，經濟復蘇根本係幻象，好多60歲有米嘅公公婆婆，記番日本64年搞奧運，旺足30年，憧憬北京08年起亦有幾十年大運，紛紛轉戰香港。日本滙錢好麻煩，多過7萬港幣就被問長問短，好多人索性拖成篋錢，抵港就一叠叠萬yen紙幣存入證券戶口，之前大圍狂入工行，仲要唔升唔買，認為咁先冇蝕底。
鄧少納又話，日本人買股票多揀保守穩健公司，好少炒即日鮮，通常長揸一年，如果啱心水，更不惜自費去中國睇業務。佢賣花讚花香話，新世紀𠵱家PE5倍，派息比率有4成，今次15間基金反應好好，仲叫佢組團去睇印尼、星洲嘅生意。佢話，今個月成交量多咗，股價升近1成，唔知係咪有支持。