可能球迷唔同意，但我求大俠就覺得上周六保頓主場贏阿仙奴，係今季英超最好睇比賽嘅頭3甲；兩隊波又甚具相剋味道，加上安歷卡倒戈替保頓入嘅世界波，冇睇嘅球迷真係走寶喇！
近幾年保頓主場對兵工廠輸少贏多，今場開波冇耐就憑1年入1球嘅戴安尼菲爾頭槌先開紀錄；呢位仁兄上季入得1球，咁啱又係對住兵工廠建功，都咪話唔邪！佢嘅入波就好似為歷來嘅宿命論埋下伏線。其後，今季踢咗10場都未有「士哥」嘅安歷卡，成場「靜英英」，點知突然喺左邊K角位抽入世界波，下半場仲幫球隊奠定3:1局面。
安歷卡一係唔掂波，一掂波就整球世界波，呢鋪都算代表作；呢位麻煩友入咗兩球都毫無表情，靜如止水，cool得嚟幾型，但睇真啲又令求大俠幾心寒。安歷卡咁耐冇「士哥」，保頓領隊艾拿廸斯都不斷畀機會佢、讚佢、同喺傳媒前幫佢辯護，真係好心有好報。
兵工廠領隊雲格睇見當年自己用50萬鎊買嘅安歷卡，今次幾乎以一己之力摧毀球隊，百般滋味在心頭！當然，兵工廠球迷可能覺得球隊輸波好唔抵，事關法比加斯、艾廸巴約同龍格保又射又頂，偏偏中晒柱角、橫楣，都算黑到落腳趾尾！
「兵工廠球迷唔知有冇諗過安歷卡如果當年無走，阿仙奴會點樣威點樣勁，但要記得，安歷卡唔離開，亨利都未必會加盟呀！」