蒙牛乳業生意咁掂，唔多唔少都係總裁牛根生嘅功勞。講起佢個名，好多人都想知點解，網友「正名」仲質疑係咪為事業而改名。牛總近日喺新浪網親自寫Blog開古，原來背後有段悲慘身世！
牛總話，1958年佢喺內蒙呼和浩特一個好窮嘅農民家庭出世，當時要用現金納公糧，佢老竇係生產隊小隊長，要帶頭將現金上繳，導致周轉不靈，就將牛總呢個啱啱滿月、排第五嘅細仔賣畀人，嗰陣賣到50蚊，已經不得了，因為農村每人每月生活費僅需3蚊，城市亦只係5蚊。
剛滿月即被賣掉
買佢嘅養父正係養牛嘅，又姓牛，但冇仔生，就將呢個養仔改名「根生」，望佢帶挈生幾個細佬妹。之不過，養父喺解放前做過警察，之後仲得到個「警長」虛銜；養母做過高官姨太太，曾經有好多財產寄存喺朋友處，點知對方唔認數，仲講盡冷言冷語。咁「右派」嘅家庭，文革時當然俾拉去批鬥，罰掃馬路，當時牛總僅得9歲，見阿媽病重，凌晨4點靜雞雞頂包掃街，卻被同學發現，一唔妥就打佢，但牛總點都唔還手，佢話，一還手就會沒完沒了。
鬥唔過人，就搞好關係，養母畀兩毫子，佢就同大家一齊使，逐漸變咗「孩子王」，細細個已明白「財散人聚」嘅道理。但係好景不常，牛總14歲時阿媽過身，未到20歲時，養父走埋，孤零零冇人理，窮到攞救濟金，所以佢話冇黨嘅關懷就冇今日。
卒之，子承父業，牛總20歲入養牛場，至今28年，養父養牛亦有38年，兩代加埋66年了。佢話，養母有兩句話令佢終生難忘：「要想知道，打個顛倒」、「吃虧是福，佔便宜是禍」。
[email protected]