鄭秀文（Sammi）自拍完電影《長恨歌》後，一直深居簡出，處於休息狀態，但前晚佢終於復工，一身紅衣艷照人，去跑馬地出席由佢擔任代言人嘅「SKII二十六周年慶祝派對」，同場仲有另一位代言人琦琦，鄭裕玲就擔任活動司儀。由於Sammi太耐冇出席公開活動，吸引近半百傳媒採訪，場面墟冚，當Sammi現身時，鎂光燈更閃個不停。
揀戲兼錄歌
Sammi喺台上客串擔任魔術師嘅助手，變出蛋糕賀SKII生日快樂。活動完畢佢接受訪問時強調自己唔係復出，係復工，佢話：「我唔係復出，係復工，唔好再話我復出。」放了一個悠長假期，Sammi話：「夠喇，都放咗差唔多一年假，𠵱家打算錄音。」
有指Sammi出年會舉行演唱會，佢聞言話：「演唱會冇聽過，不過開演唱會都唔係一件壞事。」有指因為鄭融同楊千嬅加盟東亞，致令Sammi急於復工，Sammi回應話：「完全唔關事，我做嘢係跟自己時間表，人哋有乜發展同我無關。」
另外，問Sammi喺休息期間被指患上抑鬱症，Sammi聞言頗大反應話：「都成年前嘅事，仲摷番嚟講，當中係有唔開心，人係血肉之軀，個假期都係值得。」佢話復工後會拍電影，目前仍在挑選劇本同錄新歌。
消夜歎壽司
此外，Sammi出席完活動後，即坐車返大坑寓所，至11點鐘左右再坐車出外食消夜，車輛喺灣仔兜完一大輪，結果都係去咗佢最鍾意幫襯嘅灣仔佳文魚生店，Sammi將頭髮紮起，換咗對平底靴，一入食肆就坐到吧枱位，背對門口，歎足兩粒鐘之後至離開，不過佢出門口時見大班記者依然在場，竟面帶愕然兼用雙手遮面!
採訪：何永寧、娛樂突發組
攝影：陳慧安
