(1)大市升而未狂，尋寶遊戲勢旺。今周出擊對象，中外運（598）將破浪上衝，肯定掂掂掂，係尋寶搵銀快馬。
物流航運一家親，連出名難升惡股深圳國際（152）上周勁升10%，有消息支持東方海外（316）仲犀利，大漲27%。炒落後，今周輪到中外運，上周升幅唔夠4%，目標就係呢隻。
長期大墮後
中外運長期大墮後，現價比52周低位只升36%，但深國同比升106%、東方海外亦升90%，睇基本因素，彼此P/B差唔多，PE則以東方海外5.4倍最低，但處境最佳係中外運，因NAV中，有淨現金56.7億元（人民幣．下同），同業望塵莫及。
現金多，兩面睇。弊在缺乏進取心，放在銀行收低至1.5厘利息，唔係上市公司應有態度。利在可隨時動用大量資金收購壯大，利潤與股東回報率均可大幅提升，支持股價長期向上。
中外運03年2月上市前，已持有現金61億元，集資近34億元，共達95億元。3年半以來，只係完成3宗收購，以540萬元收購北空──UPS50%權益、460萬元收購母公司旗下空港物業46%、1.3億元再買母公司天津市塘沽區地皮、貨倉與設施。3宗收購只動用1.4億元，其實母公司手上大量靚資產排期注入，留力愈久，出手愈重，一旦拍板，勢必哄動，股價即可爆升。
中外運上市招股價2.19元，曾升至4.10元，現價只升28%。同期H股指數由2197點升至最高8795點，升足3倍。作為H股指數成份股，實在羞家。
高層要爭功，好簡單，將56億元現金收購PE8倍項目，年賺7億元，比目前1年只收利息8000萬元，高出6.2億元，等同05年度（12月年結）盈利8.5億元73%，可見對盈利刺激力龐大程度。
大摩睇3.8元
對中外運如何釋出隱藏價值（HiddenValue），大摩亦有同感。在新一期分析報告指出，中外運空運A股上市，係發揮中外運潛在價值行動之一，估計中外運07年度營運溢利率開始轉向，故將其投資評級「大市同步」調高至「增持」，目標價3.80元。
其實中外運目標價，點止3.80元。以升越歷史高位4.10元再添10%計，值4.50元，屆時P/B企2.71倍，仍低過中海發展（1138）嘅3.05倍。
高彰坡