中富控股（1191）呢期成交開始有勢，冷灶升溫，可以諗諗。市場炒賣焦點之一，繼續係殼股或者變身股。單係對上星期一，又多隻北海（701），因為涉足墓園業，單日升幅88%，資金炒落後，熱捧冷灶。再睇睇中富，總市值8500萬銀咁大把，最新NAV0.51元，現價（0.126元）折讓達75%，有大折讓打底同時，財政又亁亁淨淨，有多重潛質及可能。
再講，中富上年中供股，公眾認購不足，結果禹銘（666）包銷，而中富股東名冊當中，就包括禹銘李華倫，揸住中富1.25億股（18.5%），有猛人做股東，又有多重遐想。又中富上年中供股兼合股，供股成本價講緊0.2元，中富要抽到上呢個水位，代表現價翻半番，到時，NAV折讓仲係50%樓上。唔好煲過火，冷灶燒得過。
丹楓現價吸引到痹
丹楓（271）透過聯營hold住嘅香港物業，包括油塘華順工業中心、香港仔港灣工貿中心及紅山半島。油塘及香港仔工貿區，係地產商呢期覬覦嘅新發展地區，加埋紅山半島豪宅，又估吓市場對丹楓呢批物業有冇興趣？
計計數，丹楓應佔聯營賬面值9.97億銀，等同每股0.88元，高過丹楓現價0.57元。而丹楓重秤後NAV去到兩蚊，現價折讓71%，吸引到痹。丹楓正喺0.6元阻力前，等爆邊，以NAV50%做目標，丹楓見1字頭，潛在升幅75%。
錢雋