賭王何鴻燊昨日85歲生日，十分頻撲，一日走幾場更要去澳門宣傳。賭王昨午12時先到三姨太陳婉珍家吃午飯，之後到金鐘處理私務後便趕過澳門，跟四姨太梁安琪為信德有份的豪宅壹號湖畔發售做宣傳。
到達後，賭王即場講棟篤笑說：「本人今日牛一，我個名有個『鴻』字，公開發售一定『紅』盤，鴻運當頭，賣過滿堂紅。」不過臨尾也不忘呻兩句說：「我今日生日，兩個女唔知點解仲叫我嚟做咁多工夫？」之後，三個女兒何超瓊、超鳳、超蕸便識做地送了個三層高的85歲生日蛋糕為父親賀壽。
女兒喻老父為鑽石
問賭王想要幾多歲命？一向認叻的他竟謙虛地說：「長命嘅嘢要上帝先知，我唔敢咁長命，如果太長命但行唔到、食唔到都冇用啦。」超瓊則賣口乖指賭王現時才「步入中年」，更謂有機會挑戰邵逸夫的99歲高齡，至於送上的蛋糕特別選用啤牌階磚（diamond）為圖案，她說：「祝佢好運，好似鑽石咁堅韌！」
採訪、攝影：梁錦雯、陳順楨、娛樂突發組