對上一個星期五，歐陽風推介偉易達（303），因為公司主席突然間轉口風話唔排除會派特別息，同之前嘅講法有出入，結果呢個星期公布業績真係對辦，並且宣布派發每股30美仙特別股息，連同中期息9美仙，即共39美仙，以每手1000股計，一手可收息390美元，折合相當於3042港元，真正係高息股。
其實要捉呢類短炒獲利機會，一啲都唔難，只要肯睇新聞，肯勤力做功課刨年報，要搵好股炒隨時都搵得到，既唔需要收市場消息，亦唔使有「內幕堅料」，千祈唔好以為炒股係靠收風聽消息。
中資股係今次升市火車頭，金融、地產同電訊股輪流炒上，上周一眾發霉國企東北電（042）、經緯紡機（350）同成都電纜（1202）都忽然炒上，估唔到「一山還有一山高」，更加發霉嘅中資股如長城科技（074）、方正控股（418）同四通控股（409）都相繼炒上。
追落後都要睇業績
以上「忽然」當炒股另一特色係科網股熱潮時嘅寵兒，當時炒上10蚊、8蚊，𠵱家變到3、4毫，其中四通已轉型埋做健康保健產品，業績普普通通，方正今年6月底止仲錄得3260萬銀虧損，過去幾年盈虧梅花間竹，似乎未搵到賺錢良方。長城科技係幾隻之中業績算最見得人嘅，過去幾年營業額同盈利都持續有增長，去年底止錄得每股純利26.9仙，PE只不過5倍，揀落後股炒，呢隻較有基本因素支持。
歐陽風