06年就快過去嘞，回顧今年開售嘅一手樓盤，雖然唔係好多，不過負面消息就未停過，例如劈價散貨、發展商唔按指引賣樓、虛構成交、定價偏離二手市場等等。喺《香港討論區》上面有個2006年我最憎一手樓盤選舉，結果長實嘅葵涌雍雅軒以26票榮登榜首。
葵涌雍雅軒以26票成為網友最憎嘅一手樓盤，佔投票率近58%；第二位係𠵱家賣緊嘅馬鞍山嵐岸，發展商亦都係長實，有10票，佔22%；第三位係新地荔枝角曼克頓山，有3票，佔7%。
ivan2000話：「我揀咗嵐岸，因為佢定價高過同區接近一倍，又玩小動作，直頭CHEAP爆。」jt921211：「Ofcoz長實雍雅軒!Theenvironmentisextremelypoor，but長實當雍雅軒係豪宅。」
hkhk1997話：「長實城中駅將個日本字『駅』做屋苑名，已被TVB《最緊要正字》寸佢呢個唔係中國字，相對嘅中文漢字係「驛」。至於讀「站」是佢哋自創讀音，英文名字又用了法文lePoint，搞到人人都唔知點讀自己住址，住係個度真係都覺羞恥。」將軍澳廣場亦認為：「長實嵐岸，點都係佢啦，cheap嘢當貴嘢賣。」朗尼仔8號：「我投嵐岸，因為佢花巧多，無實際，而且搞淡馬鞍山樓市。」
okman167：「長實三重彩！中硬！」mr1963：「嵐岸廣告不知所謂，唔知賣乜，冇一個單位係有『有窗廁』。」屯門之友：「長實雍雅軒眾望所歸，無得留低。」
qoo108：「新地曼克頓山又唔係有hill，叫乜山呀!」yiuallan：「新地曼克頓山，咩面試喎，不知所謂。」
約八成網民揀咗長實盤，問過佢哋公關點睇呢份網民選舉，不過佢哋無回應。