今晚大家一定會坐定定睇曼聯對車路士，咁啱今晚唔使做直播，我已經約好班朋友去酒吧睇波。
一向覺得啲人去酒吧睇波，未必係因為屋企無裝CABLE，都係想湊熱鬧啫！啤酒係睇波必需品，幾十人一齊「啤啤佢」，現場間唔中又聽到有人為愛隊表現失準而破口大罵，睇波氣氛就係咁樣嚟啦！
平時喺球彩台做直播，都好難專心睇波，好多時每隔幾分鐘就要報即場賠率，咁又有幾十場賽事同時進行，一有入球我哋就要報賽果，再加埋「PHONEIN」，咁忙點專心睇波呢？
着住球衣撐愛隊
記得上年紅魔大戰藍戰士好好睇，費查符符碌碌頂入一球，咁就贏咗，今屆我希望愛隊技術性擊倒對手！呢兩年車仔崛起，喺英超畀人無敵嘅感覺，其實邊有一隊無敵㗎！唔少球隊都開始洞悉點贏車仔，今年佢哋畀我感覺已經無上年咁強，比賽過咗三分一，已經輸過畀熱刺同米堡，新購入嘅球員又未融入，紅魔大有機會㗎！各位曼迷今晚一於着住球衣撐愛隊贏波啦！
WENDY
由歐國盃EuroBabes，變身球彩台受歡迎主持。