今晚睇完曼聯對車路士嘅大戰，緊接呢邊就有華倫西亞主場對皇家馬德里嘅好戲。華倫傷兵成籮，無埋射手韋拿，照睇難有還手之力；同日「軍情盤」尚有同曼、車戰同時進行嘅基達菲主場對利雲特主W；另外尾場西維爾客W亦咪錯過。
利雲特兩中堅停賽
基達菲教練蘇斯達今日原本領軍迎戰前度執教球隊利雲特，但因上周對維拉利爾時被逐，今日要服停賽令，未能在場邊督師；但現今科技發達，遙控後備席上教練團，要作出調度排陣指令亦冇難度。反而對手利雲特今仗有艾華路美亞及施薩馬田這對中堅停賽，前者缺陣影響尤其大，作客場合要守都未必有足夠實力，基達菲大有機會延續主場勝績。
尾場畢爾包主場對西維爾，主隊民族屬性強烈，每季尤其希望喺皇馬及巴塞兩大強隊身上取得佳績，有說更係誇張到會用上十天八天時間去備戰，之前一周聯賽多數揸流攤。咁啱畢爾包下輪就係作客對皇馬，呢場幾大都捧西維爾。文：華度