新加坡籍攝影師LeslieKee前晚喺中環出席攝影展，場內擺放咗佢幫藝人影嘅超性感相，大部份女星唔係袒胸就係露背，但估唔到咁仍然不及一班男藝人搶鏡，原來吳彥祖、余文樂、連凱、許志安同張智霖等均以赤裸同露臍毛嚟搶鏡，安仔最肯為藝術犧牲，佢側身瞓低拍攝幾乎全裸嘅照片，僅以牛仔布遮住重要部位。吳彥祖都唔輸蝕，將條褲拉到落大脾。
許志安噚日以表演嘉賓身份，出席女童軍總會90周年紀念慶典嘅綵排，對於露毛照面世，佢話：「呢次係為慈善籌款，而我對攝影師好有信心，要影就應該放盡。不過我哋都有共識，就係唔可以見到重要部位。」佢透露拍攝時為免尷尬都有清場，要求所有女士離場。
未夠Man唔敢露
飛魚王子方力申憑游水叻而闖入娛樂圈，所以身形勻稱，佢着住白色泳褲影相，問到方力申點解唔學其他男藝人咁大膽，佢話：「我未夠man嘛，畀多十年我啦，影呢輯相時，我瘦咗10磅，條泳褲係16、17歲時買嘅。」方力申又誇口話等自己再成熟啲，或者到時有埋囝囝，不排除兩父子影露何B仔相喎。
剛為人父嘅張智霖嗰輯相，佢着住條爛牛仔褲，佢話仲未幫個BB改名，但都有幫老婆（袁詠儀）湊BB，佢話：「都有人搵BB拍奶粉廣告，不過我推晒，唔想將生活商業化，我覺得冇必要，𠵱家出到街好多巿民都恭喜我，但暫時冇咁快追多個住。」
LeslieKee嘅攝影展噚日開始到下月3日喺香港設計中心舉行，呢批相會推出《Superstars》攝影集，定價300美金（約2,340港元），善款會撥捐世界宣明會協助南亞海嘯災民。
採訪：駱華齡
攝影：葉君海
