大班Ｃ約咗成班人到中國會食晚飯，電召左丁山去參加埋一份，熱鬧吓。夜晚橫掂無事，於是立即執埋公事包，趕去中國會，點知隻腳未踏出門，電話響起，梗係聽咗電話先啦，一聽就係十幾分鐘，惟有急急腳衝去中國會，去到舊中國銀行大廈門口，收到一位Ｃ先生電話留言：AllpersonarewaitingforyouinChina。嚇咗一跳，全中國人民都等緊自己？講笑呀！
上到十三樓，大班鬧左丁山遲到，又問：「我留言喺你個秘書台，話成村人喺中國會等緊你，你收唔收到？」當然收到啦，不過留言翻譯成英文之後，走晒樣啫，ChinaClub變咗China，嚇死人咩。
「中國會」以舊中國情調為賣點，啲鬼佬以為咁嘅裝修、氣氛就係二十世紀三十年代嘅中國，好鍾意幫襯，一到咗夜晚八點，客人湧至，全會滿座，座上客幾乎全是外國人，我哋嗰枱變成係少數民族，中國會實際係鬼佬會。大班話中國會老闆鄧永鏘英文寫得好，成個鬼佬咁款，故此知道晒鬼子佬口味，間會晚晚爆棚，成個中環，只有鏞記啲生意比佢更好。
坐滿人之後，中國會仲嘈吵過中午陸羽茶室，跟住仲有歌女唱懷舊時代曲，有黃飛鴻式表演，樂聲鼓聲夾雜，直情嘈到震耳，大家講說話似鬧交，加上會所燈光比較昏暗，故此現場係法國餐場面，聲音就似戲棚旁邊，如此中西結合，只有在中國會先至會遇上。議員Ａ話：「食廣東菜最緊要燈光火猛，睇清楚啲菜式，食法國餐先至要有燭光情調，但今晚調轉晒，原來咁先至可以吸引外國人！」外國人現在喺香港少晒，如果中國會能吸引佢哋留在香港，會係好事。議員Ａ話好多外國朋友鍾意去星加坡，空氣好兼且到處可以用英語溝通喎，其次就係去上海，外國人面孔容易搵銀兼搵女仔，講唔講英文都冇問題啦。香港要做國際城市，需要多啲外國人留港充撐場面，中國會喺吸引外國人方面，可扮演特別角色。