早前有問卷調查謂，大半數受訪小朋友最希望爸爸媽媽做的事，唔係加零用、買玩具，而係放假時可以全家總動員出街玩。做人父母自然無SayNo，但問題是全家大細有老有嫩，去主題樂園嗎？一家四口入場交通連使費起碼過千！歐家父母就識揀得多，趁周日全家殺入白石遊樂園，BBQ、放風箏、踩單車、golf等大小通殺的玩意，平民街坊價已可玩足半天！
記者：尹天仇
攝影：譚盈傑
模特兒：歐生、歐太、朗朗、Gigi（thegroup）
合家歡勝地玩乜有乜
白石俱樂部前身為白石難民營，有番咁上下年齡，大抵對這裏都有深刻印象吧！沒錯，白石正是那個曾於九十年代發生多次大型暴動而出現A1頭條的難民營，當時都不知幾咁哄動。事隔多年，就今日所見，白石雖然景觀依舊，前望有大片吐露港及船灣淡水湖，遠眺則是八仙嶺，滿有大自然氣息，惟昔日戾氣已盡消，160萬平方呎的面積，更令這兒成為全港最大的合家歡遊樂園。
反轉兒童特區
講明大小通殺，打算帶小朋友同行的家長大可放心，在兒童特區joyhouse場外設有兩座巨型吹氣彈床，年僅4歲的朗朗同7歲家姐Gigi就不知幾高興，話咁快已飛撲入小丑彈床內，同大班新相識的朋友仔起勢猛跳，失控程度猶如大人中六合彩一樣。跳到滿頭大汗，未夠，兩人瞬間殺進室內。雖只是撈金魚、掟波仔一類原始玩意，但原來對經常屈喺屋企打遊戲機的小朋友來講，反而趣味十足，只見歐氏姐弟不斷撈呀撈，身旁的爸爸媽媽只係充當畀錢工具不斷買紙網，但同樣好開心：「以為最怕諗放假要帶佢哋去邊度玩，𠵱家唔使煩。」玩完靜態的玩意，遊樂園仲有片青草地，可以供遊人踩單車兼放風箏，全家人大可在同一日內進行多項親子活動。
爸爸打golf扮上等人
囝囝囡囡玩得開心，輪都輪到大人玩番吓。白石俱樂部最矚目不僅是足以容納五千人的燒烤場，還有是其面積6萬幾呎、有4個高爾夫果嶺、堪稱全港最大的高爾夫球練習場。場內共有140條人造草及20條真草練習球道，即使兩手空空毫無準備都不打緊，反正只須付上球桿及球道租用費，即刻可以落場打番轉，有需要還可以請教在場的工作人員，教番你一招半式，威畀囝囝囡囡睇。至於做媽媽的，就梗要夫唱婦隨，若嫌悶，不妨約多幾個親朋戚友開吓雀局，反正小朋友有自己的世界，呢個時候媽媽當然要輕鬆吓，再唔係，兩夫婦仲可以到桌球室，重溫當年拍拖的溫馨場面。
海景場五千人齊齊BBQ
玩夠，是時候食餐飽。比足球場更要大成倍的燒烤場，可容納超過五千人齊齊燒，且場內設備完善，總有一個洗手盆喺左近，唔似得去郊野公園BBQ咁不便。燒烤爐分有蓋同無蓋，前者有鐵皮頂好遮蔭，即使來陣過雲雨也不怕濕身，後者則面向180度無敵大海景，要點揀全憑個人喜好，就採訪當日所見，共250個的燒烤爐早於下午三、四點爆滿，建議若周末前往，最好致電預約以免撲空。至於食物方面，選擇超過五十款，燒烤人數眾多不妨點隻乳豬（$198/隻），其他如乳鴿、蒜茸醉蝦等都相當特別，比一般任點任食燒烤場有誠意得多，歐氏家庭所選的四人套餐都不過$250，收費尚算合理。若有時間，還可以等到睇完日落先走，圓滿結束整日親子遊。
白石俱樂部（26319900）
地址：馬鞍山白石
開放時間：8:00am-11:00pm
網址：www.whiteheadclub.com
交通：可於馬鞍山新港城及沙田大會堂乘免費穿梭巴士，行車時間可參考網址；另備有免費停車場
收費
高爾夫球：練習球道 平日$50/小時、假日$70/小時
租桿：鐵桿$10、木桿$30
吹氣彈床：$20/15分鐘
撈金魚：$10/3個網
BBQ：開爐費$80（包蜜糖、燒烤餐具10份及炭2包）
燒烤食物：約$20-$50/磅
單車：$12/小時
桌球：$50/小時
麻雀：$100/4小時