買股會上癮，你信唔信呀？目前港股咁好景，10月至今，足足升了1600點，若由年頭起計，升幅更高達4300點；如果散戶買啱股票嘅話，應該賺到盤滿缽滿，好似國壽（2628）咁，今年就升咗1.7倍，令到冇入貨嘅散戶都不斷揼心口。係《香港討論區》便有網友問有冇人上咗股票癮，冇股票係身邊唔安樂嘅投票。
原來係呢個牛市，已經有唔少網友中晒「股毒」，唔知同東南亞流行嘅蠱毒有冇關呢？超過七成嘅網友話自己一定要揸股票或其他投資，只有二成多嘅人到現在還有定力，仲可以全揸現金，唔買股票。
網友Hktrader2006就講自己中毒幾深，佢話「今朝約咗人出街食早餐，唔記得帶收音機，又有張淡倉過夜，搞到成個人都失魂落魄，食完嘢就急急腳衝入銀行睇報價。」Aquariusman講自己都幾沉迷，一日要睇幾次價；Sekseng就話買開股票真係有心癮㗎，一有錢就想買。Bobebobe1仲話，「炒股開心過拍拖㖭！」
抽新股抽上癮
其實，原來唔少人都係10月，第二輪新股熱先至開始中「股毒」，GreenRabbit講自己，「認識股票都係最近呢幾個月嘅事，𠵱家每天都心思思，真係有?驚會上癮。」Fatkin亦講，「我玩咗個幾月，一開始係抽中行，抽咗都冇乜點理，之後再抽埋招行及工行，現在覺得自己有啲沉迷。」
買股賺錢係人都想，個市愈升就愈想買，但老土都要講多句，要清楚知道自己嘅投資底線，係跌市時識止蝕。