昨日很多銀行及證券行的網上股票系統「死機」，在下午市況逆轉下挫時，不少投資者都走唔到貨，眼甘甘睇住蝕錢。係《香港討論區》內就有唔少網友留言，咆哮控訴。
r32506話「火都滾，出唔到貨。」eddiesoosk就講同搶無分別，任人魚肉。Mawa亦話：「有無搞錯呀！國際金融中心都搞成咁，網上銀行淨係識收費！」更有網友提出陰謀論，懷疑大戶夾埋佢哋一齊「屈機」，趁「死機」散戶走唔到貨時，質低個市。Sweetherb就好無奈咁講，「可憐嘅散戶，有怨無路訴。」
當中最慘嘅網友莫過如網友Sayuki，佢就好傷咁話，「我買咗call輪，突然急跌，但《鴻財網》又唔畀落價，電話又唔通，焗住睇住跌，足足跌咗17格，好鬼傷；打去投訴，我問佢你又無止蝕盤落，再有同類型事件發生你點樣保障我，佢只係識講對唔住，我話你哋會累死好多人，尤其玩輪嘅人，呢次真係一鑊俾佢玩起！」，成日講話投資涉及風險，𠵱家要將「冧機」列為投資風險因素之一；聯交所可能會話，無人需要負責任，只係散戶貪心，盲目高追啫！