賭王何鴻燊聽日就85歲大壽，佢噚日去咗銅鑼灣，夥拍76歲嘅好友梁兼紹參加150歲或以上男子元老網球雙打賽事，結果以8比4力壓對手，成為五連冠，果然老當益壯！
四姨太梁安琪見賭王贏咗，即刻錫佢一啖獎勵，恩愛到痹，不過賭王好謙咁話：「可能我就嚟生日，佢哋讓我少少，我都冇乜打過個波，盡咗力，啲波又快又勁。」
力撼十姑娘
問賭王勤做運動係咪佢嘅養生之道？賭王話：「做運動好重要，唔使食好多補品，我咁耐以嚟生活好似灰姑娘，要瞓夠8個鐘，10點就瞓，朝早會游水做運動，十年如一日，風雨不改。其實好似我呢個年紀嘅人已經走晒，但我唔想走住。」不過賭王就話四姨太成日掛住開會搵錢，唔會打波。
在場記者問賭王有乜嘢生日願望？點知佢聽錯咗係「生意願望」，就話：「最近我俾人挑戰緊，不過我冇咁易輸，我叫緊伙記全力迎戰。」講講吓，賭王突然有感而發話：「知唔知點解我間賭場遲遲未上到市？因為嗰單官司（指與十姑娘興訟一事）。我對葡國嘅法律好清楚，呢啲官司閒閒哋會拖三五七年，不過律師話我會贏，我亦心裏有數。」至於梁安琪就話乖女超盈會趕返嚟同阿爸祝壽，佢又話囡囡近排讀書好咗，仲攞咗個英國文學獎㖭！
