美國有感恩節假期，暫時唔使睇美股住，外圍市轉睇日股，噚日一開就跌200幾點，港股好難唔跟隨低開，不過開市見咗低位後就反覆挾上，下午日股跌幅收窄，個市挾多一轉，但係周末前動力似乎略為不足，恒指最後跌5點收市。
上星期一本來想追落後買番啲香港興業（480）同中信泰富（267），惟市況比預期為差，結果將入市行動一拖再拖，平白失去今次短炒機會，尤其係隻興業，噚日升2.8%，突破4元關，已升穿本月初高位3.97元，破位形勢明朗化，下周唔係開得太高可能會追番少少。
聯通吼位買入
另一隻心水股係聯通（762），公布營運數據理想後，突破9元關，呢隻話晒係藍籌股，無理由落後得咁緊要，中電信（728）同網通（906）都升到飛起，呢架慢車點都要踩踩油，下星期等造旗時吼位買。
個市高位似升還跌，難免令人入市態度遲疑，點樣去解決呢個心理難關，一直都係趙飛雲好想解決嘅問題。畏高症人人都會有，要克服，第一樣係睇今次升浪累積到幾多財富，一路贏上嚟的話，揸住盈利去賭可以放心啲入市，若然未贏過就咁衝入市，就只宜小注怡情了。第二樣，係專揀落後而有潛力嘅股票，個市水浸，呢類股票遲早會被人發掘出來。
趙飛雲