食壽司，從未試過咁開心！今日帶咗香港電台第二台3個《瘋Show快活人》主持梁繼璋、梁思浩及貴花田出嚟，一試呢期勁人氣嘅天下壽司；一邊食，梁繼璋同梁思浩大爆：「貴花田用一套打麻雀呃人章法去食壽司！」另外仲俾呢3個《瘋》人，發現呢度竟然有A5和牛同馬肉刺身等隱藏美食！
記者：朱崇德
攝影：周旭文
3個主持喺佢哋喪摷Menu之下，竟然發現原來呢度有A5和牛同馬肉手卷食；和牛雖然係澳洲貨，但經思浩呢個老饕品評：「絕對有9成日本質量！」梁繼璋就話：「馬肉更是香港極難食到，嚟到必試！」
A5和牛手卷（左）$35 馬肉手卷（右）$35
牛肉夠膽生食，一定對質量好有信心，生食有種溶吓溶吓感覺，正！至於馬肉入口鮮嫩，汁料非常惹味，勁過癮！
貴花田天恕人怨！
北寄貝係熟壽司？
呢邊「雙梁」大講食壽司睇法！那邊廂的貴花田，只見佢遲疑不決仲未起筷！細問下先知原來佢係唔食生嘢㗎！「我年輕貌美時食海膽，嗰陣腥味嘔足我3日3夜，自此之後就唔食生壽司！」璋馬上幫口解畫：「呢啲叫『唔熟唔食』！打麻雀一樣，將呃人嘅章法去食壽司……不過最搞笑係佢將紅紅哋色嘅北寄貝當做熟壽司食！」望住貴花田一臉錯愕表情：「吓！係咩？唔知喎！」全場人笑彎了腰！
海鰻壽司$35
將整條海鰻完完整整包住壽司飯，由於未切開，海鰻食落口時份外油甘香脆；加埋醋味極濃的壽司飯，將油膩的感覺大大降低，不論視覺同味覺上都係最高享受！
韓辣泡菜混吞拿魚卷物$25
以韓國泡菜做壽司，天下都算第一人！卷面撒上七味粉，味道匹配之餘，一入口已叫人有強烈衝擊，至於泡菜的酸辣味又在慢慢滲透，辣得有層次，嗜辣者食得必定過足癮。
生之藝術品
天下壽司呢期紅爆！除冠絕全佐敦嘅4,000呎加30米迴轉壽司輸送帶外，佢請咗個有二十幾年經驗嘅日籍總廚OhamaMasahiro先生，佢喺70年代師承大阪花村學做壽司，係當時日本首批學做加州卷──Fusion壽司嘅老師傅！鎮店嘅1碟6種口味嘅「色彩繽紛」上枱，梁繼璋即刻話：「一般人認識嘅壽司，只係一嚿肉、一嚿飯撻埋一齊……但呢度嘅，係『生』嘅藝術、係堆砌出嚟嘅藝術品！」
法式風情$85
壽司竟然玩瀨汁裝飾，呢個好明顯係法式做法，三件壽司分別為章魚牛油果、三文魚黑欖同比目魚西柚；分別配以辣椒仔、日本芥辣同黑醋汁，一碟壽司可變出3種食法，口味極盡多變。
色彩繽紛$105
呢個色彩繽紛係3位主持人最大讚的壽司，做到五顏六色，味道有海膽、八爪魚、拖羅、三文魚、紅黃花飯等不同變化，加埋有如和菓子咁靚嘅賣相，正是食得又睇得！
面燒雜錦魚生飯$35
壽司版飯Tastic，面放魚生、甜蝦、雜菜、毛茄，份量足件頭大，真係足一人午餐份量；邊食邊感魚生的新鮮之餘，蟹子爽脆又夾雜其中爆出汁醬，喜歡食魚生者，真係幾抵食！
壽司仔大比拼
考題：整件三文魚壽司！
淨係嚟食一餐？當然冇咁益3位主持人啦！天下壽司師傅突然爆出整三文魚壽司比賽！
判詞
思浩對手亁濕適中，好快手做好飯糰，唔似其他兩位主持雙手黐晒飯，且握飯嘅力度亦幾適中，唔會太鬆而散開、唔會太實而唔好味！
冠軍頒獎禮
任何比賽總有黑幕！原來思浩除咗有首《壽司仔》嘅歌外，最近仲跟某某酒店大廚學做壽司；難為其餘兩位主持，毫無準備下輸晒！
睇路搵食
店舖名稱：天下壽司（23761638）
地址：尖沙嘴柯士甸道122號麗斯中心UG全層
交通：佐敦道地鐵站D出口，左轉柯士甸道步行3分鐘
座位：80人
人均消費：$180
明日預告
麥玲玲食飯都要睇住方向揀靚位，學嘢要睇明日介紹！