今周全球焦點──車路士作客曼聯。為求公平，雖係愛「車」之人，但都替曼聯諗吓贏波嘅理由，但係真係搵唔到！
究竟曼聯嘅致命傷係乜呢？C朗拿度獨食？沙夏水準不穩？朗尼無帶射門鞋？其實係曼聯無得變陣！只要C朗嗰邊，搵個勁嘅後衞睇住，朗尼畀人凍結佢，中場有兩個防守中場，唔畀沙夏行近禁區，再加兩邊快翼負責反守為攻，加一個高大前鋒喺前面負責撞開里奧費廸南，曼聯就死咗九成！
仲有，曼聯換後備都無用，因為根本無人可用；打法已被睇穿，無招可變，曼聯唔只會輸畀車路士，仲會輸得好慘！
紅軍串巴塞穩贏
今明兩日，有大量「筍盤」益大家！利物浦串巴塞，前者歐冠盃已出線，可以專心聯賽，為下屆歐冠盃資格力爭上游，對住狀態一般嘅曼城，好難輸。至於巴塞，佢哋有「及時雨」古莊臣，今晚贏波難度幾乎係零！
星期日，先揀巴勒莫贏國米，純粹主觀鍾意主隊！西甲方面，我要薩拉戈薩贏波，中咗，下周再馬後炮分析啦！
周鵬
商業1台《球迷集中贏》主持
電郵：[email protected]