小巴後排有個大肚婆講手機，我下意識覺得她跟朋友討論如何搶位生仔。這樣的「直覺」當然不可靠，看來我比孕婦神經更緊張，很想替她們度橋，排除人滿萬難，順順利利入院產子，不用捱走廊走鬼床位，不必跟內地大肚婆打崩頭。
孕婦上街抗議後，醫管局承諾全港增加廿個公立醫院產婦床位。二十張床，唔到喉唔到肺，簡直多餘。這分明是欺負大肚婆粗身大勢，無力再搞對抗。睇來大肚婆陣線要擴大串連，大肚婆的另一半、家公家婆、舅仔姑奶全部動員起來組成聯盟，向政府施壓。肚已經大了，仔不能不生，但條數可以走，全港孕婦效法內地走數婆，生完一走了之，不必害怕拿不到出世紙的，政府說這是人權法，既保障得內地人，香港市民肯定不怕秋後算賬。
香港孕婦向大陸人學習，走數不外乎面皮夠厚這一招，放下香港人身段，向內地同胞看齊好了。公立醫院追數無能，壞賬驚人，醫管局高層厚皮老臉年年分花紅。反觀私院，有嚴謹入院要求，幾乎是零爛賬。私院抓住內地孕婦生仔的商機，賺到笑。可憐香港大肚婆公私院兩邊撲，有仔冇碇生，泰國燕窩魚翅辣蟹生仔團很快應運而生，在布吉坐月子天天做泰式按摩和spa，使費不會貴得過養和，平均只生1.6個孩子的小家庭也負擔得起。面對不曉得是來自湖北抑或湖南殺過港像蘇丹紅蛋一樣的大肚床霸，本地孕婦執生，明知無法以卵擊石硬撼，又不屑走數，唯有走埠。