有假有錢遠遊固然開心，但想玩得暢快放心，嚴選旅遊保險更加重要。不少人買旅保總貪平貪快，經常對保單眼尾也不看一眼。「唔識死」的結果？若有意外，隨時一蚊都冇得賠。今日找來專家，教大家做個精明投保者。
記者：陸俊雄
攝影：陳偉強
Model：大文、Gen
專家話：精明第一步 先睇不受保事項
一份旅保最高保額多少，當然是投保者最關心的，但國際專業保險諮詢協會會長羅少雄話：「應先看不受保事項！」事關保單愈是天花龍鳳，不受保事項就愈需看清楚。他舉例：「若恐怖襲擊有得保，是指各類恐襲都包括嗎？又如旅行期間香港住所遭人爆竊，原來都有得保，例如蘇黎世就會賠10萬。」所以記得先了解附帶條件，才算精明第一步。
保險可加可減
另外羅少雄亦強調：「保險是可加可減。」他指普羅大眾買任何保險時，都不知有「投保人權益」，即投保人可按個人需要，與保險公司商討加減保單項目。當然這要額外花錢，但總比買份「冇料到」的旅保更好。而且現在上網購買保險方便，但熟悉細則的投保人不多，沒有保險經紀從旁解釋，誤解保單內容好常見。
最搞笑承保項目
藍十字和滙豐的旅遊保險，都有一桿入洞的現金獎賞。前者鑽石旅保計劃獎金上限為$3,000，並要在指定球場上入洞；後者同樣上限為$3,000，但每次只發$2,000，雖入洞兩次都沒有多賞，但對高爾夫球迷已是厚待。
旅保逐格睇
旅遊保險項目多多，正因這樣，很多人投保後都「懶得睇」，其實當中很多不保事項是有清楚列明。羅少雄認為，若追保費不成，投保人責無旁貸。而今次得他教路，明送錢入你袋。
恐襲有得保 最高賠償$600,000
內容：藍十字其中一個特點，是承保因「恐怖襲擊」而引致的人身意外、醫療費用、全球緊急援助、旅程延誤等。
盲點：不保事項內卻指有關生物、化學及核子之恐怖活動均不承保。
專家過招：「恐怖襲擊」字眼太空泛，如炸彈含化學物又怎樣？筆者就扮顧客打電話到藍十字求證過，除了核爆外，一般炸彈爆炸均會承保。
跌打針灸有上限 最高賠償$1,500
內容：如蘇黎世、英國保誠等，現在很多旅保的醫療費用保障中，已包括跌打或針灸治療。
盲點：跌打或針灸治療要留意費用上限。如英國保誠指明是回港3個月內，每日$150，而總上限是$1,500。
專家過招：除留意治療的每日上限和總上限外，要知單據最遲要幾時申報，亦要留意在高危運動中受傷所需的治療，是否包括在內。
延誤8粒鐘就賠 最高賠償$2,500
內容：因天災、天氣惡劣、工業行動、公共交通工具延誤，導致行程延誤，是最常見、亦最易追討不足保費的項目。
盲點：延誤以多少小時做計算單位？如蘇黎世「暢遊保」以每8小時賠$250做單位；滙豐更以每12小時計算，總上限$2,500。
專家過招：參加旅行團更要注意，因遇上延誤或改變行程，旅行社有機會安排其他飲食、住宿作代替。若團員沒拒絕新安排，回港後大多追討不成。
自駕冇得保 最高賠償$0
內容：在個人責任條款中，有指因意外導致他人受傷或財物損失，需負上法律責任時，保險會包括訴訟費。
盲點：如藍十字在不受保事項中，有列出因使用汽車、飛機、船隻所引起的法律責任都不承保。
專家過招：在外地租車或駕駛小型飛機，若發生意外不受保好正常。自駕人士，其實早就清楚需另購第三者責任保險，但很多人明知故犯。
下星期齊去探企鵝
11月起至明年3月都係去南極嘅佳期，啱啱有個記者就嚟咗探我哋，想知道有關佢同埋我哋企鵝仔喺呢個極地嘅趣事，就記得留意星期一開始嘅「好想飛」啦！
