到馬場，主要目的為睇馬，賭馬，但有時亦變咗睇人。譬如十一月十九日沙田跑馬，第六場係本地二級賽──香港短途錦標賽預賽，由香港精英班跑一千米。「精英大師」病後不復當年勇，仍然被捧為次熱門，大熱門係「燦惑」，此馬流完鼻血之後復出，竟然成為大熱門，可見好多馬迷對佢有信心。
靚馬出場，梗係要到沙圈望吓啲馬嘅狀態、毛色㗎啦，以左丁山嘅業餘眼光嚟睇，隻隻馬嘅毛色都唔靚，「精英大師」與「燦惑」分別有健康缺點，成為熱門，唔敢捧場，左丁山決定買八號「步步勇」，貪佢健康好，往績不俗，十幾倍有分頭㖭。拖邊隻好呢？咦「紙醉金迷」有當起之銳，可以做配腳噃；隔籬有人講：「李嘉欣好鬼靚！」於是拿起望遠鏡，果然見到李嘉欣與許晉亨兩人十指緊扣，親密異常，許爸爸世勳先生滿面笑容、許媽媽塊面拉緊，全無笑意，只係掛住望住佢哋隻「燦惑」。隔籬位老友話：「嗱，燦惑捧盃美人笑，呢次公開見家長，好事近矣。」好似有道理噃，許晉亨冇理由帶李嘉欣入馬場亮相而冇厘威風㗎？
於是搵步步勇、燦惑、紙醉金迷三隻互串，就咁就撻咗三重彩，蝕注碼，認真唔抵，早知重槌步步勇單Win好過。所以入到馬場睇人，係好分心嘅，何況睇靚女㖭。惡佬明事後對左丁山講：「許晉亨、李嘉欣一齊入場，可能係逢場作興啫，你喺馬場咁耐，以前夠見過劉嘉玲喺沙圈見家長啦，嗰次許世勳有冇贏馬呀？」陳年舊事，唔記得咯，只記得上一季見到「天行者」馬主趙式明帶埋阿媽入場，吸引全場目光，因為嗰位阿媽叫做何琍琍，應該有五十歲嘞啩，仍然艷壓羣芳，光芒四射，一舉手，一投足，十分迷人。當時左丁山對惡佬明講：「以前趙世光係馬場常客，幾時見到有何琍琍喺度呀？呢次怕母女要威番一次咯。」於是二話不說，買「天行者」獨贏，果然順利取勝。呢次成功，種下偏見，見到李嘉欣就落注「燦惑」，抵彎。