選舉委員會身負選舉新一屆特首嘅神聖使命，全港市民喺未有普選前，都好恨有呢一票㗎，所以唔同界別人士爭位都好正常。立法會會計界代表譚香文Mandy就踢爆，香港會計師公會近來搞咗好多平價內地考察團同trainingcourse，而且仲有會計師公會團隊選委會候選人參與，質疑係咪同選舉會臨近嘅宣傳有關呢？
反之支持民主派嘅選委會候選人Mandy就繼續被封殺，依然無得透過公會向全港2萬4千個會計師發放通訊。Mandy話約過council啲人見面，但獲悉最快都要喺1月先安排到。1月喎，咪就係搞完選委會之後？難怪Mandy覺得成單嘢有政治因素嘅。
八方問過公會，發言人話呢啲考察團成日都有㗎啦，唔係特別多或者平咗，旨在令會員更了解內地發展，一切同政治與選舉無關。發言人仲話，council啲人成日飛嚟飛去唔喺香港，要見面係難啲，但一定會盡量安排，叫Mandy放心喎。