某日行荃灣，兆和街有間「兆和茶餐廳」，老死話佢好別致，一定要試吓！入門口見到兩部40吋大Plasma，好一般茶記格局啫；再望落餐牌，有啲創意喎！甚麼口水雞、哈爾濱餃子、蒜泥白肉、獅子球都有得食，老闆話：「我哋係北方風味茶餐廳！」真係聞所未聞喎！好有北方小館子感覺，但係即叫即做，又幾似茶記喎！5至6分鐘就出菜，效率奇高。
老闆推介香辣鮮雞酸辣粉，上枱一大鍋，簡直係兩人份量！鍋底粉條好特別，透明爽滑似粉絲，但又煙韌好多，仲帶股微香：「呢隻係紅薯粉條！香港周圍都食唔到，我特別喺四川訂返嚟，而酸菜亦係自己醃製！」入口唔太酸，仲有微微鮮菜青味，感覺更難得！至於雞件亦講到明係新鮮雞，唔用雪雞！$28大大鍋，真係有啲過份！
茶記菜牌間間千篇一律、唔理生熟求其炒埋一碟！對於我哋呢啲唔識煮飯嘅住家男人，叫亁炒牛河、揚州炒飯都係求穩陣，忽然俾我搵到間咁有Heart，希望大家去撐吓！
記者：朱崇德
兆和茶餐廳（24198218）
地址：荃灣兆和街36號地下
Cheap精：要食又平又靚嘅嘢，我有好介紹！